Fyrir nokkrum árum síðan var gerð úttekt á leyfamálum ríkisins, sem kynnt var haustið 2016 á morgunverðarfundi með tæknifólki ríkisins í Hörpu. Niðurstaða þeirrar greiningar var að bæta þyrfti yfirlit yfir leyfamál og að kostnaður ríkisins væri um 800 m.kr. árlega vegna Microsoft leyfa. Haustið 2017 fór af stað frekari greiningarvinna, þar sem upplýsingum frá stofnunum var safnað saman til að fá sem besta heildaryfirlit yfir leyfamál hjá ríkinu. Í kjölfarið var gegnið til samninga við Microsoft og ákveðið að einbeita sér að skrifstofuhugbúnaði (desktop) en að taka þjóna og gagnagrunnsleyfi í framhaldi.
Um hvað snýst verkefnið?
Þann 1. júní 2018 keypti Fjármálaráðuneytið, fyrir hönd A-hluta stofnana ríkisins, hugbúnaðarleyfi fyrir Microsoft hugbúnaðarlausnir fyrir skrifstofuumhverfi. Þann 1. júní 2021 var samningurinn endurnýjaður eftir samþykki í ríkisstjórn og gildir hann til fimm ára. Verkefnið snýr að skipulagningu og undirbúningi á innleiðingu á samræmdum skrifstofuhugbúnaði ríkisins.
Af hverju er verkefnið unnið?
Hagræði ríksins í því að kaupa þessar hugbúnaðarlausnir frá Microsoft snýst ekki einvörðungu um sameiginleg innkaup hugbúnaðarlausna, heldur frekar að réttri nýtingu þeirra. Verkefnið mun stuðla að því að tryggja rétta innleiðingu og nýtingu lausnanna hjá stofnunum ríkisins. Rétt innleiðing snýr meðal annars að tæknilegum uppsetningum, öryggi gagna, nýtingu nýrra samvinnumöguleika, samnýtingu þekkingar og samræmingu vinnuumhverfa.
Fyrir hverja er verkefnið unnið?
Verkefnið mun snerta flesta starfmenn A-hluta stofnana ríkisins, eða um 11% starfsmanna á íslenskum vinnumarkaði (tölur byggðar á “Tölur og útgefið efni” Fjármála- og efnahagsráðuneytisins). Auk þess snertir það marga nemendur í ríkisreknum framhaldsskólum og háskólum.
Við hvað styður verkefnið?
Verkefnið styður aukið hagræði í nýtingu samræmdra hugbúnaðarlausna. Með því að koma öllum stofnunum ríkisins á nýjan tæknigrunn opnast tækifæri á auknum og sveigjanlegum samskiptamáta með öruggum hætti milli og innan stofnana. Verkefnið styður einnig aukið gagnaöryggi og bættum rekstri fyrir allar stofnanir.